प्रिमियर लिगमा म्यानचेस्टर यूनाइटेडको जित, आर्सनल बराबरीमा रोकियो

काठमाडौँ – इंग्लिस प्रिमियर लिग फुटबलमा म्यानचेस्टर यूनाइटेडले बर्नमाउथलाई हराएको छ । गएराति भएको खेलमा यूनाइटेडले बर्नमाउथलाई ३–० गोलले पराजित गरेको हो ।

यूनाइटेडका क्यासेमिरो, लुके सा र मार्कुस रासफोर्डले एकरएक गोल गरे । जितसँगै चौथो स्थानमा रहेको यूनाइटेडको १७ खेलबाट ३५ अंक भएको छ । एक खेल बढी खेलेको न्यूक्यासलको पनि ३५ अंक छ । तर गोल अन्तरमा न्यूक्यासल तेस्रोमा छ ।

गएराति भएको खेलमा शीर्ष स्थानको आर्सनलले न्यूक्यासलसँग बराबरी खेलेको छ । आर्सनल र न्यूक्यासलले गोलरहित बराबरी खेलेका हुन् । आर्सनल १७ खेलमा ४४ अंकका साथ शीर्ष स्थानमा छ । आर्सनल दोस्रो स्थानको म्यानेचस्टर सिटी भन्दा ८ अंकले अगाडि छ । सिटीको १६ खेलमा ३६ अंक छ । गएराती नै भएको अर्को खेलमा ब्राइटनले एभर्टनलाई ४–१ गोलले र फुलहमले लेस्टरसिटीलाई १–० गोलले हराएको छ ।