अमिताभ बच्चन सुटिङको क्रममा घाइते

काठमाडाैँ : अमिताभ बच्चन हैदराबादमा सुटिङको क्रममा घाइते भएका छन् । उनले आफ्नो ब्लगमा यसबारे जानकारी दिएका हुन् । अमिताभ हाल मुम्बईमा आफ्नो घरमा आराम गरिरहेका छन् । अमिताभ बच्चन प्रभासको फिल्म ‘प्रोजेक्ट ए’ को सुटिङ गरिरहेका थिए । एक एक्सन सिनका बेला उनको करङमा चोट लागेको छ । हैदराबादमा चेकअपपछि अमिताभलाई मुम्बई पठाइएको छ ।

अमिताभ बच्चनले आफ्नो ब्लगमा लेखे, ‘रिब केजमा मांसपेशी फुटेको छ । सुटिङ रद्द गरिएको छ । पट्टी बाँधिएको छ र उपचार चलिरहेको छ । असाध्यै दुखिरहेको छ । हिँड्न–डुल्न समस्या भइरहेको छ । सास फेर्न पनि समस्या भइरहेको छ । यो पीडाका लागि मलाई केही औषधी दिइएको छ । निको हुन अझै केही समय लाग्नेछ ।’

अमिताभले लेखे, ‘जालसामा प्रशंसकलाई भेट्न पाउँदिन’

अमिताभ बच्चनले लेखे, ‘म निको नभएसम्म मेरो सबै कामकाज बन्द गरिएको छ । म जालसामा आराम गरिरहेको छु । आवश्यक चिजका लागि थोरै हिँड्नेछु । हो, आराम त चलिरहन्छ । मलाई यो भन्न समस्या भइरहेको छ कि म जालसाको आफ्नो गेटमा आफ्ना प्रशंसकलाई भेट्न सक्छु वा सक्दिनँ । तपाईँहरूले जालसा आउने योजना बनाइरहेका मानिसहरूलाई पनि यसबारे जानकारी दिनुहोस् । यसबाहेक सबै कुरा ठिक छ ।’