ए डिभिजन लिग : संकटाको लज्जास्पद हार

काठमाडौं । शहीद स्मारक ए डिभिजन लिगको साविक विजेता मछिन्द्र क्लबले संकटा एफसीलाई हराउँदै अंकतालिकाको पाँचौ स्थानमा उक्लिएको छ ।

आज बिहीबार दशरथ रंगशालामा भएको खेलमा मछिन्द्र ३–१ ले विजयी भएको हो । उसका लागि देवेन्द्र तामाङ, विमल घर्ती मगर र ओलावाले आफिजले गोल गरे ।

खेलको चौथो मिनेटमै मछिन्द्रलाई देवेन्द्र तामाङले गोल गर्दै अग्रता दिलाएका थिए । पुजन उपरकोटीको प्रहार गोलरक्षक टिकेन्द्र थापाले समाउन नसक्दा फर्किएको बललाई देवेन्द्रले पोष्टको दिशा दिएका हुन् ।

खेलको १९ औं मिनेटमा निशेन सुब्बाको क्रसमा विमल घर्ती मगरले हेडर गोल गर्दै अग्रता दोब्बर पारे । ६९ औं मिनेटमा सौरभ लिम्बुको पासमा ओलावाले आफिजले संकटाका गोलरक्षक टिकेन्द्रलाई वान भर्सेस वानमा बिट गर्दै गोल गरे ।

खेलको ७८ औं मिनेटमा संकटाका लागि जुनियर एन्कंगेले निशान खड्काको क्रशमा सान्त्वना गोल फर्काए ।यस जितसँगै मछिन्द्र २१ अंक जोडेर पाँचौ स्थानमा उक्लिएको छ । मछिन्द्रले १४ खेलमा ५ जित, ६ बराबरी र ३ हारको नतिजा निकालेको छ । संकटा भने छैटौं हारसँगै ११ औं स्थानमा छ । संकटाको ४ जित र ४ बराबरीले सहित १६ अंक रहेको छ ।