जिम्बावेविरुद्धको खेलमा कुशल भुर्तेलको अर्धशतक

आईसीसी एकदिवसीय विश्वकप छनोट अन्तर्गत जिम्बावेविरुद्धको खेलमा नेपालका कुशल भुर्तेलले अर्धशतक बनाएका छन् । हरारे स्पोर्ट्स क्लबमा टस हारेर पहिला ब्याटिङको निम्तो पाएको नेपालका लागि कुशलले ६३ बलमा अर्धशतक पूरा गरेका हुन्  ।

क्रिजमा ओपनरद्वय कुशल भुर्तेल र आसिफ शेख अविजित रुपमा रहेका छन् ।

उनको ओडिआई करिअरको छैटौं अर्धशतक हो । ब्यक्तिगत एक रनमा जीवनदान पाएका कुशलले त्यसपछि उत्कृष्ट ब्याटिङका साथ अर्धशतक बनाउँदै जिम्बावेलाई दबाबमा राखेका छन् । आसिफ शेख ५७ बलमा २ चौकासहित २९ रनमा क्रिजमा छन् ।

तर तीव्र गतिका बलर रिचर्डको चौथो ओभरको चौथो बलमा कुशल भुर्तेलले ब्यक्तिगत एक रनमा जीवनदान पाएका थिए । एज लागेको बल फस्ट स्लिपमा सिकन्दर राजाले सहज क्याच छाड्न पुगेका थिए । त्यो समय कुशल १२ बलमा १ रन बनाएर खेलेका थिए । त्यसपछि कुशलले आफ्नो रनको गती बढाएका थिए ।

नेपालले १४ औं बलमा रनको खाता खेलेको थियो । कुशल भुर्तेलले एक रन जोड्दै खाता खेलेका थिए । लगत्तै अर्को बलमा आसिफ शेखले चौकाका साथ आफ्नो ब्यक्तिगत खाता खेलेका थिए ।