हज गर्न १५० देशका १८ लाख जना साउदी अरेबीया पुगे
हजका लागि विभिन्न देशका १८ लाखबढी मानिसहरु साउदी अरेबीया पुगेका छन् ।
साउदीका हज तथा उमराह मन्त्री डा. तौफिक अलरबियाहका अनुसार मंगलबारसम्म १५० भन्दा बढी देशका १८ लाख हजयात्री त्यहाँ पुगेका हुन् ।
करिब १० लाख भक्तजनहरू अरब राष्ट्रबाहेक अन्य एसियाली मुलुकबाट पुगेका छन् । यसैगरी अफ्रिकी मुलुकबाट १३.४ प्रतिशत र युरोप, अमेरिका र अष्ट्रेलियाबाट २.१ प्रतिशत तीर्थयात्री त्यहाँ पुगेका छन् ।
अफ्रिकी देशबाट जाने हाजीको संख्या दुई लाख २२ हजार ८६३ रहेको छ । युरोप, अमेरिका र अष्ट्रेलियाबाट ३६ हजार ५२१ भक्तजनले भ्रमण गरेका छन् ।
नेपालबाट हजका लागि १ हजार ९२ जना गएका छन् । नेपाल हज समितिका अध्यक्ष मकबुल मिया (शाह) का अनुसार जेठमै नेपालबाट उक्त संख्यामा हजयात्री साउदी गएका हुन् ।
तीन वर्षपछि साउदी अरेबीयाको मक्कामा यति ठूलो संख्यामा भक्तजन भेला भएका हुन् । यसअघि कोरोना भाइरसको संक्रमणका कारण हजमा प्रतिबन्ध लगाइएको थियो ।
