‘ओह माइ गड २’ लाई विद्यालयमा पनि देखाउनुपर्छ : अक्षय कुमार
बलिउड अभिनेता अक्षय कुमार स्टारर फिल्म ‘ओह माइ गड २’ ले यतिबेला हलमा दर्शकहरुबाट राम्रो प्रतिक्रिया पाइरहेको छ । बक्स अफिस कलेक्सनमा ‘गदर २’ को तुलनामा निकै पछि रहेपनि यसले उठाएको विषयवस्तुलाई दर्शकहरुले रुचाइरहेका छन् ।
अक्षयका साथै पंकज त्रिपाठी र यामी गौतमको मुख्य भूमिका रहेको फिल्मले बलियो ‘वर्ड अफ माउथ’ का कारण दिनानुदिन बक्स अफिसमा कमाइ वृद्धि गरिरहेको छ ।
भारतीय समाचार संस्था एएनआईका अनुसार अमित राय निर्देशित फिल्मले यौन शिक्षाको मुद्दालाई उठाएको छ । यो फिल्मलाई भारतीय सेन्सर बोर्डले एडल्ट सर्टिफिकेट दिएको छ । यसैबीच, अभिनेता अक्षय कुमारले ‘ओह माइ गड २’ लाई विद्यालयहरुमा देखाउनुपर्ने बताएका छन् ।
सामाजिक सञ्जालमा भाइरल भइरहेको एक भिडियोमा उनले फिल्मलाई एडल्ट सर्टिफिकेट दिएकोप्रति पनि घुमाउरो ढंगमा असन्तुष्टि जनाएका छन् । उनलाई उद्धृत गर्दै एएनआईले लेखेको छ, ‘कमालको कुरा बताऊँ, यो पहिलो एडल्ट फिल्म हो जो टीनएजरका लागि बनेको छ ।’
‘ओह माइ गड २’ मा अक्षयले भगवान शिवको भूमिका निभाएका छन् । उनी पंकज त्रिपाठीको मद्दतका लागि आउने/जाने गरिरहन्छन् । पंकज यौन शिक्षाको मुद्दाका लागि अदालतमा लडिरहेको फिल्ममा देख्न सकिन्छ ।
