राजस्थानमा ट्रकले बसलाई ठक्कर दिँदा ११ जनाको मृत्यु

गुजरातको भावनगरबाट मथुरा जाँदै गरेको बसलाई ट्रकले ठक्कर दिँदा ११ जनाको मृत्यु र १५ जना घाइते भएका छन् ।

जयपुर–आगरा सडकअन्तर्गत राजस्थानको भरतपुरमा नदबई इलाकाको हन्तरा पुलमा बुधबार बिहान बिग्रिएपछि बस रोकिएको थियो । रोकिएको बसमा पछाडिबाट आएको ट्रकले ठक्कर दिएको राजस्थान प्रहरीले बताएको छ ।

ट्रकले बसलाई ठक्कर दिँदा मृत्यु भएका ११ मध्ये ६ महिला र ५ जना पुरुष रहेका छन् । अरु घाइते यात्रुको जिल्ला अस्पतालमा उपचार जारी छ ।