चीनको टिमविरुद्ध नेपाली युवाको सहज जित
काठमाडौं । चिनियाँ नयाँ वर्षको उपलक्ष्यमा आयोजित मैत्रीपूर्ण फुटबलमा नेपाली यू–२३ टिमले चीनको क्विनझाई युथविरुद्ध ५–१ को सहज जित निकालेको छ ।
शनिबार त्रिपुरेश्वरस्थित्र दशरथ रंगशालामा नेपाललाई जित दिलाउन समीर तामाङले दुई गोल गरे । सञ्जीव विष्ट, छिरिङ लामा र निराजन धामीले समान एक गोल थपे । चिनियाँ टिमका जासी पेङकोउले सान्त्वना गोल फर्काएका थिए ।
विष्टले दोस्रो मिनेटमा नै गोल गर्दै नेपाललाई अग्रतामा राखेका थिए । ३९औँ मिनेटमा समीरले गोल गरेपछि नेपालले पहिलो हाफमा २–० को अग्रता बनाएको थियो ।
५४औँ मिनेटमा समीरले नै नेपालको अग्रतालाई ३–० मा पुर्याए । त्यसको नौ मिनेटपछि छिरिङ लामाको गोलबाट नेपालले ४–० को अग्रता बनाएको थियो ७५औँ मिनेटमा निराजन धामीले गोल गर्दै नेपाललाई ५–० को सहज अवस्थामा पुर्याए । पाहुना टिमका पेङकोउले खेलको ७८औँ मिनेटमा एक गोल फर्काए ।
चिनियाँ नयाँ वर्षको उपलक्ष्यमा राष्ट्रिय खेलकुद परिषद् (राखेप) र नेपालस्थित चिनियाँ राजदूतावासको संयुक्त आयोजनामा मैत्रीपूर्ण फुटबल भएको हो ।
