प्रधानमन्त्री कप एनभीए भलिबल : गण्डकीलाई हराउँदै हेल्प नेपाल बन्यो च्याम्पियन

गण्डकी प्रदेशलाई हराउँदै टिपटप हेल्प नेपालले आठौँ प्रधानमन्त्री कप एनभीए महिला तथा पुरुष भलिबल प्रतियोगिताको पुरुषतर्फको उपाधि जितेको छ ।

उपाधिसँगै हेल्प नेपालले ८ लाख रुपैयाँ प्राप्त गर्नेछ । दोस्रो भएको गण्डकी प्रदेशले ४ लाख रुपैयाँमा हात पारेको छ । उपाधिसँगै हेल्प नेपालले लिग चरणमा गण्डकीसँग भोगेको हारको बदला समेत लिएको छ ।

शनिबार त्रिपुरेश्वरस्थित राष्टिय खेलकुद परिषद् (राखेप) को कभर्डहलमा सम्पन्न पुरुषतर्फको फाइनलमा गण्डकीलाई ३–१ को सेटमा हराउँदै हेल्प नेपालले उपाधि उचालेको हो । हेल्प नेपालले गण्डकीलाई २५–२२,२०–२५,२५–० र २५–२० ले हराएको हो ।

आजै भएको पुरुषतर्फको फाइनलमा त्रिभुवन आर्मी क्लबलाई हराउँदै नेपाल पुलिस क्लब तेस्रो भएको छ । पुलिस क्लबले आर्मीलाई ३–२ को सेटमा हराएको हो। पुलिस क्लबले आर्मीलाई ३१–२९,१३–२५,२२–२५,२५–२३ र १५–८ को जित निकाल्यो ।

तेस्रो भएको पुलिस क्लबले २ लाख रुपैयाँ प्राप्त गरेको छ ।