क्यानले नेपाल प्रिमियर लिग आयोजना गर्ने
नेपाल क्रिकेट संघ (क्यान)ले नेपाल प्रिमियर लिग (एनपीएल)को आयोजना गर्ने भएको छ ।
क्यानको बिहीबार बसेको बैठकले एनपीएल यसै वर्षको नोभेम्बर–डिसेम्बरमा आयोजना गर्ने निर्णय गरेको हो । तर, मिति भने सार्वजनिक गरेको छैन ।
यस्तै, बैठकले क्यानअन्तर्गतको राष्ट्रिय छनोट समिति गठनका लागि संयोजक र सदस्यहरूको मापदण्ड तयार गर्न महाप्रबन्धकको संयोजकत्वमा तीन सदस्यीय समिति गठन गर्ने निर्णयसमेत गरेको छ । क्यानका अनुसार समितिमा महाप्रबन्धकसँगै क्रिकेट अप्रेसन्स म्यानेजर र प्रमुख वित्त अधिकृत सदस्य रहनेछन् ।
बैठकले टीयु क्रिकेट मैदानको पिचको पुनः निर्माण गरी स्तरोन्नति गर्ने, हाल सञ्चालनमा रहेको जिम हललाई व्यवस्थित गर्न विस्तार गरी जिम हलमा प्रयोग हुने आवश्यक उपकरण थप गर्ने तथा उक्त खेल मैदानलाई विस्तार एवं व्यवस्थित गर्न फेन्सिङ सारी ढलको व्यवस्थापन गर्ने निर्णय गरेको क्यानका सचिव पारस खड्काले जानकारी दिए ।
अन्तर्राष्ट्रिय क्रिकेट परिषद्बाट बजेट प्राप्त भएपछि सातै प्रदेशमा इन्डोर ट्रेनिङ सेन्टर निर्माण गर्ने निर्णयसमेत भएको खड्काले सुनाए ।
