‘नरसिंहाः अवतार’ मा राजेश हमालसँगै देखिँदै नीति शाह

दिवाकर भट्टराईको निर्देशनमा बन्ने फिल्म ‘नरसिंहाः अवतार’ यतिबेला चर्चामा छ । यसै फिल्मबाट राजेश हमालले ८ वर्षपछि कमब्याक गर्न लागेपछि यो फिल्म सबैको चासोमा छ ।

यसैबीच, फिल्मको मुख्य अभिनेत्रीमा नीति शाह अनुबन्धित भएकी छन् । निर्माण टिमले एक पोस्टर सार्वजनिक गर्दै शाह फिल्ममा भित्रिएको जानकारी दिएको हो । फिल्ममा उनको भूमिका के हुन्छ भन्ने निर्माण पक्षले खुलाएको छैन ।

नरसिंहाको अर्थ भगवान विष्णुको उग्र अवतार हो । निर्माणपक्षले बिहिबार फिल्मको घोषणा गरिएसँगै थिम पोस्टर सार्वजनिक गरेको थियो । जहाँ, थिम पोस्टरले युद्धको सङ्केत गर्छ ।

क्रिएटिभ सिने आर्टको प्रस्तुति रहने फिल्म यही भदौबाट छायाङ्कनमा जाने तयारी छ । फिल्मको बजेट तीन करोडभन्दा माथि हुने बताइएको छ ।