अस्ट्रेलियामा बेपत्ता सुभाषको खोजबिन गर्न राजदूतसँग आग्रह

नेपालका लागि अस्ट्रेलियाका राजदूत फेलिसिटी भोल्कसँग ९ महिनाअघि अस्ट्रेलियामा हराएका काभ्रेपलाञ्चोकको पाँचखाल नगरपालिका–७ का एक युवकको खोजबिन गर्न आग्रह गरिएको छ ।

२७ वर्षीय सुभाष बोलखे सिड्नी सहरबाट १८ दिनदेखि परिवारबाट सम्पर्कविहीन छन् । पाँचखालका नगरप्रमुख महेश खरेलले सुभाषका बुवासहित परिवारका सदस्य लिएर राजदूतसँग आज औपचारिक भेट गरी खोजबिनका लागि आग्रह गरेका हुन् ।

सुभाषको पछिल्लो अवस्थाबारे जानकारी लिई खोजतलास गर्न राजदूतसँग विशेष आग्रह गरिएको नगरप्रमुख खरेलले बताए । “राजदूतले तत्काल जनशक्ति परिचालन गरी खोजबिन गर्न लगाउने आश्वासन दिनुभएको छ, हामी आशावादी भएका छौँ”, उनले भने ।

बुवा सुदर्शन बोलखेका अनुसार अध्ययनका लागि अस्ट्रेलिया गएका कान्छा छोरा सुभाष सिड्नी सहरमा नौ महिनादेखि एक्लै बस्दै आएका थिए । राजदूतसँगको भेटपछि केही आशा पलाएको उनले सुनाए ।

नगरप्रमुख खरेलले राजदूतलाई सुभाषको कागजातसहित निवेदन दिएका छन् । बोलखे परिवारले पनि सुभाषको खोजबिनमा सहयोग गर्न सिड्नीस्थित नेपाली तथा त्यहाँका निकायसँग आग्रह गर्दै आएको छ ।