पाकिस्तानमा पनि देखियो एमपक्स संक्रमण
पाकिस्तानमा ‘एमपक्स’ रोगको सङ्क्रमित फेला परेका छन् । पाकिस्तानको स्वास्थ्य मन्त्रालयका अनुसार खैबर पख्तूनख्वाको मरदान जिल्लामा बस्ने एक व्यक्तिमा सङ्क्रमण फेला परेको हो ।
सङ्क्रमित व्यक्ति हालै खाडी मुलुकबाट आएको बताइएको छ । सङ्क्रमित व्यक्तिले यसबिचमा भेट गरेका व्यक्ति पत्ता लगाउन सुरु गरिएको मन्त्रालयका अधिकारीले जनाएका छन् ।
पाकिस्तानको स्वास्थ्य मन्त्रालयले बिहीबारमात्र एमपक्सबारे एडभाइजरी जारी गर्दै विमानस्थल र नाकाहरूमा कडा स्क्रिनिङ भइरहेको जनाएको थियो ।
पाकिस्तानी स्वास्थ्य मन्त्रालयले बिहीबार सूचना जारी गरी विमानस्थल र त्यस्ता सबै ट्रान्जिट पोइन्टमा कडा स्क्रिनिङ भइरहेको बताएको छ ।
यसैबीच पाकिस्तानका प्रधानमन्त्रीका स्वास्थ्य संयोजक डा मुख्तार अहमदले सरकारी अस्पतालहरूलाई सावधानी अपनाउन निर्देशन दिइएको बताएका छन् । स्वास्थ्य मन्त्रालय कुनै पनि परिस्थितिको सामना गर्न सतर्क रहेको उनको भनाइ छ ।
यसअघि स्विडेनमा एमपक्सको पहिलो संक्रमण देखिएको थियो ।
