सिटीको जितमा हाल्यान्डको ह्याट्रिक

नर्वेजियन फरवार्ड एर्लिङ हाल्यान्डको ह्याट्रिकप्रेरित म्यानचेस्टर सिटीले इंग्लिस प्रिमियर लिगमा वेस्ट ह्यामविरुद्ध ३–१ को जित निकालेको छ ।

शनिबार वेस्ट ह्यामको मैदान लन्डन रंगशालामा भएको खेलमा सिटीलाई जित दिलाउन तीनै गोल हाल्यान्डले गरे । घरेलु टिमले सिटीकै रक्षक रुवेन डियाजबाट आत्मघाति गोल उपहार पाएको थियो ।

खेलको १०औँ मिनेटमा हाल्यान्डले पहिलो गोल गर्दै सिटीलाई अग्रतामा राखे । तर, १९औँ मिनेटमा डियाजको आत्मघाति गोलमा वेस्ट ह्याम खेलमा फर्कियो ।

३०औँ मिनेटमा हाल्यान्डले दोस्रो गोल गरेपछि सिटीले अग्रता दोब्बर बनाएको हो । यस्तै, खेलको निर्धारित समय सकिन सात मिनेट बाँकी रहँदा हाल्यान्डले ह्याट्रिक गरेपछि सिटीले ३–१ को जित पक्का गरेको हो ।

जारी सिजन सात गोल गरेको हाल्यान्डको यो दोस्रो ह्याट्रिक हो । उनले यसअघि इप्सविच टाउनविरुद्ध पहिलो ह्याट्रिक गरेका थिए ।

जितसँगै तीन खेलबाट नौ अंक जोडेको साविक विजेता सिटी तालिकाको शीर्ष स्थानमा छ । समान खेलबाट तीन अंक जोडेको वेस्ट ह्याम तालिकाको १४औँ स्थानमा छ ।

प्रिमियर लिगमा शनिबार नै भएका अन्य खेलमा एस्टन भिल्लाले लेस्टर सिटीविरुद्ध २–१ को र बर्नमाउथले एभर्टनविरुद्ध ३–२ को जित दर्ता गरेका छन् ।