खोप लगाउन अस्वीकार गरेका अमेरिकी पुरुषको कोरोना संक्रमणका कारण मृत्यु

कोभिड खोपको खिसीटिउरी गर्ने संयुक्त राज्य अमेरिकाको क्यालिफोर्निया राज्यका एक पुरुषको कोरोनाभाइरसकै कारण ज्यान गएको छ। उनी एक महिना कोभिडका कारण थलिएका थिए।

हिल्सङ मेगाचर्चका सदस्य स्टीभन हार्मन कोभिड खोपका प्रखर विरोधी थिए। उनले खोप नलिने भन्दै उक्त खोपको खिसी गर्न एउटा शृङ्खला नै बनाएका थिए।

“मलाई ९९ वटा समस्या छन् तर तीमध्ये खोप चाहिँ हैन है,” सात हजार फलोवर भएका ती ३४ वर्षीय पुरुषले जुन महिनामा ट्वीट गरेका थिए।

लस एन्जलिसबाहिर पर्ने एउटा अस्पतालमा उनको निमोनिया र कोभिड-१९ को उपचार भइरहेकोमा गत साता मृत्यु भयो। आफ्नो जीवनका अन्तिम दिनमा बाँच्नका लागि गरेका सङ्घर्षको प्रमाण छाडेर उनी गएका छन्।