केनप्रेरित इंग्ल्यान्डको लगातार दोस्रो जित

कप्तान ह्यारी केनको उत्कृष्ट प्रदर्शनप्रेरित इंग्ल्यान्डले यूईएफए नेसन्स लिगमा लगातार दोस्रो जित निकालेको छ । मंगलबार राति घरेलु मैदान वेम्बली रंगशालामा भएको खेलमा इंग्ल्यान्डले फिनल्यान्डविरुद्ध २–० को जित निकालेको हो । इंग्ल्यान्डलाई जित दिलाउन दुवै गोल केनले गरे ।

खेलको पहिलो हाफ गोलरहित बराबरीमा समाप्त भए पनि ५७औँ मिनेटमा केनले इंग्लिस टिमलाई अग्रतामा राखेका थिए । यस्तै, ७६औँ मिनेटमा केनले नै अग्रता दोब्बर बनाएपछि इंग्ल्यान्डले २–० को जित सुनिश्चित गरेको हो ।

प्रतियोगिताको समूह–२ मा लगातार दोस्रो जित निकालेको इंग्ल्यान्ड तालिकाको दोस्रो स्थानमा छ । इंग्ल्यान्डले ६ अंक जोडेको छ । समान खेल खेल्दा पनि अंकविहीन फिनल्यान्ड तालिकाको पुछारमा छ ।

आजै भएको यही समूहको अर्को खेलमा ग्रीसले आयरल्यान्डविरुद्ध २–० को जित निकालेको छ । दुई खेलबाट ६ अंक जोडेको ग्रीस तालिकाको शीर्ष स्थानमा छ । अंकविहीन आयरल्यान्ड भने तालिकाको तेस्रो स्थानमा छ ।