अन्तरिक्षमा फसेका दुई यात्रीको ‘स्पेसएक्स मिशन’सँग भेट
अन्तर्राष्ट्रिय अन्तरिक्ष स्टेसनमा फसेका दुई अन्तरिक्ष यात्रीलाई पृथ्वीमा फर्काउने ‘स्पेसएक्स मिसन’ को ‘ड्रयागन क्याप्सुल’ इन्टरनेशनल स्पेस स्टेसन (आइएसएस)सँग जोडिएको छ ।
फाल्कन ९ रकेटले फ्लोरिडाको केप क्यानवेरलबाट शनिबार अपराह्न १ः१७ बजे उडान भरेको थियो र ड्रैगन अन्तरिक्ष यानमा सवार क्रू–९ मिसनले आइतबार साँझ ५ः३० बजे आईएसएससँग सम्पर्क गरेको थियो ।
‘ड्रयागन क्याप्सुल’ ले आइएसएससँग जोडिएपछि नासाका अन्तरिक्ष यात्री निक हेग र रूसी अन्तरिक्ष यात्री अलेक्जेन्डर गोर्बुनोभ साँझ ७ बजेपछि आफ्ना तैरिरहेका सहकर्मीलाई अँगालो हालेर स्टेसनमा चढेका थिए ।
“म ड्रागन फ्रिडमबाट हाम्रो नयाँ कम्प्याडरहरूलाई स्वागत गर्न चाहन्छु,” फसेका दुई अन्तरिक्ष यात्रीहरूमध्ये एक यात्री स्टेशन कमान्डर सुनी विलियम्सले भने ।
हेग र गोर्बुनोभ फेब्रुअरीमा अन्तरिक्ष स्टेशनबाट फर्किँदा उनीहरूले अन्तरिक्षविद् विलियम्स र बुच विल्मोरलाई फिर्ता ल्याउनेछन् । बोइङले डिजाइन गरेको अन्तरिक्ष यान (स्टारलाइनर) को समस्याका कारण आईएसएसमा उनीहरूको बसाइ महिनौंसम्म लम्बिएको थियो ।
विल्मोर र विलियम्सलाई गत जुनमा आईएसएसमा पुर्याउँदा नयाँ विकसित स्टारलाइनरले चालक दलसहितको आफ्नो पहिलो उडान गरिरहेको थियो ।
उनीहरू त्यहाँ केवल आठ दिनका लागि मात्र हुनुपर्ने थियो, तर त्यहाँ उडानको क्रममा स्टारलाइनरको ‘प्रोपल्सन सिस्टम’ मा समस्या देखापरेपछि नासाले योजनामा आमूल परिवर्तन गर्न बाध्य भएको थियो ।
स्टारलाइनरको सफल अवतरणको विश्वसनीयताको बारेमा हप्तौंको गहन परीक्षणपछि नासाले अन्ततः यसलाई आफ्नो चालक दल बिना पृथ्वीमा फर्काउने निर्णय गरेको थियो ।
अर्बपति एलन मस्कद्वारा स्थापित निजी कम्पनी स्पेसएक्सले आईएसएस चालक दलका सदस्यहरूलाई घुमाउन अनुमति दिन प्रत्येक छ महिनामा नियमित मिसनहरू उडान गर्दै आएको छ ।
तर नासाका विशेषज्ञहरूलाई स्टारलाइनरको विश्वसनीयताको मूल्याङ्कन गर्न र कसरी अगाडि बढ्ने भन्ने निर्णय गर्न थप समय दिनका लागि क्रू–९ को प्रक्षेपण अगस्टको मध्यदेखि सेप्टेम्बरको अन्त्यसम्म स्थगित गरिएको थियो ।
हेग र गोर्बुनोभले करिब पाँच महिना आईएसएसमा बिताउनेछन् । विल्मोर र विलियम्सले त्यहाँ आठ महिना बिताउनेछन् । क्रु–९ ले आफ्नो बसाइको क्रममा करिब २०० वैज्ञानिक प्रयोगहरू सञ्चालन गर्नेछ ।