श्रीमती हत्याका अभियुक्त बान्तवा रेड नोटिसपछि कतारबाट पक्राउ

कर्तव्य ज्यान मुद्दामा इन्टरपोलबाट रेड नोटिस जारी भएका एक व्यक्ति कतारबाट पक्राउ परेका छन् । भोजपुर साविक युँ गाविस-५ का गजेन्द्र वान्तवा राई पक्राउ परेका प्रहरीले जनाएको छ ।

कतारको नेसनल सेन्ट्रल ब्युरो (एनसीबी) दोहाको समन्वयमा पक्राउ परेका उनलाई सम्बन्धित मुद्दामा काराबही गर्न मंगलबार नेपाल फिर्ता ल्याइएको प्रहरी प्रधान कार्यालयले जनाएको छ ।

उनी श्रीमती झापाको मेचीनगर नगरपालिका-११ धाईजन बस्ने ४८ वर्षीया श्रीमती शर्मिला तामाङको हत्यामा संलग्न थिए । श्रीमतीको हत्यापछि फरार भएका उनलाई अन्तर्राष्ट्रिय स्तरमा खोजतलास एवम् पक्राउ गर्नको लागि नेपाल प्रहरी प्रधान कार्यालय अपराध अनुसन्धान विभाग इन्टरपोल शाखाको अनुरोधमा इन्टरपोलबाट २०८१ साल असोज १ गते रेड नोटिस जारी भएको थियो ।

उनलाई सम्बन्धित कसुरबमोजिम कानुनी कारबाहीको लागि इलाका प्रहरी कार्यालय, धुलाबारी, झापाबाट खटी आएको प्रहरी टोलीलाई बुझाइएको प्रहरी प्रधान कार्यालय इन्टरपोल शाखाले जनाएको छ ।