बंगलादेशमा डेंगीका कारण एकै दिन १० जनाको मृत्यु
बंगलादेशमा डेंगीका कारण शनिबार एकै दिन यो वर्षको सबैभन्दा बढी १० जनाको मृत्यु भएपछि संक्रमितको संख्या ३१० पुगेको बंगलादेशको स्वास्थ्य सेवा महानिर्देशनालयले जनाएको छ ।
स्थानीय समयअनुसार शनिबार बिहान ८ बजेसम्मको पछिल्लो २४ घण्टामा थप एक हजार ३४८ जनामा लामखुट्टेको टोकाइबाट सर्ने डेंगीबाट संक्रमित भएका थिए ।
डेंगी ज्वरो एडिस लामखुट्टेको टोकाइबाट सर्ने भाइरल रोग हो । यो रोगले टाउको दुख्ने, उच्च ज्वरो आउने, थकाइ लाग्ने, मांसपेशी र जोर्नी दुख्ने, ग्रन्थी सुन्निने, वान्ता हुने र चिलाउनेजस्ता लक्षणसहित गम्भीर स्वास्थ्य समस्या निम्त्याउँछ ।
यस भाइरसबाट यो वर्ष संक्रमित हुनेको संख्या ६३ हजार १६५ पुगेको सरकारी तथ्यांकले देखाएको छ ।
यस वर्ष डेंगीका कारण अक्टोबरमा १३४, सेप्टेम्बरमा ८०, अगस्टमा २७ र जुलाईमा १२ जनाको मृत्यु भएको थियो । बंगलादेशमा सन् २०२३ मा डेंगीका कारण एक हजार ७०५ जनाको मृत्यु भएको थियो ।
सन् २०२२ मा २८१ र सन् २०१९ मा १७९ जनाको डेंगीका कारण मृत्यु भएको थियो ।
डेंगीको बढ्दो संख्यासँग जुध्न बंगलादेशी स्वास्थ्य अधिकारीले लामखुट्टेको प्रजनन रोक्न र लार्भा विरोधी अभियान सञ्चालन गर्न कडा उपाय चालेका छन् ।
