लिग टु क्रिकेटमा नेपालले स्कटल्याण्डसँग खेल्दै

अमेरिकामा जारी आईसीसी क्रिकेट विश्वकप लिग-२ अन्तर्गत नेपाल आज (सोमबार) आफ्नो चौथो तथा अन्तिम खेलमा स्कटल्यान्डसँग भिड्दै छ। खेल डालासस्थित ग्रान्ड प्रेरी स्टेडियममा नेपाली समयानुसार राति सवा ९ बजे सुरु हुनेछ।

यसअघि पहिलो खेलमा नेपालले स्कटल्यान्डलाई ५ विकेटले हराएको थियो। तर घरेलु टोली अमेरिकासँग नेपाल दुवै खेलमा पराजित भएको थियो। स्कटल्यान्डले भने अमेरिकासँगका दुवै खेल जितेको थियो।

जारी शृंखलामा स्कटल्यान्ड र अमेरिकाले २/२ खेल जितेर समान ४ अंक बनाएका छन्। नेपालले भने ३ खेलबाट २ अंक मात्र जोड्न सकेको छ।

अब नेपाल आज अन्तिम खेल जित्दै अमेरिका भ्रमण सुखद् रूपमा अन्त्य गर्न चाहन्छ।