४० वर्षीय कुमाल हतियारसहित पक्राउ

दाङमा प्रहरीले हतियारसहित एक जनालाई पक्राउ गरेको छ । पक्राउ पर्नेमा लमही नगरपालिका–३ वनगाँउ हरियाली टोल निवासी ४० वर्षीय गणेश कुमाल रहेको जिल्ला प्रहरी कार्यालय दाङका सूचना अधिकारी एवम् प्रहरी नायव उपरीक्षक ईश्वर थापाले जानकारी दिए ।

प्रहरी नायब उपरीक्षक थापाका अनुसार कुमालको घरबाट भरुवा बन्दुकसहित नाल एक थान, १३५ थान छर्रा, २९ थान गोली बरामद गरिएको छ ।

त्यसैगरी प्रहरीले बेचालु अवस्थाको भरुवा बन्दुकको काठको बट थान–१, बेच्नका लागि राखेको भरुवा बन्दुक नाल दुई थान, बन्दुकको नाल बनाउन प्रयोग हुने फलामको पाइप एक थान, ११९ ग्राम ३६० मिलिग्राम बारुद, केप १८ थान, रोल केप चार थान र भरुवा बन्दुकमा प्रयोग हुने सुतीको लत्ता दुई थान प्रहरीले जफत गरेको छ ।

गोप्य सूचनाको आधारमा गएको प्रहरीले कुमाललाई बिहीबार बिहान ६ः३० बजे घरबाटै हतियारसहित पक्राउ गरेको हो । पक्राउ परेका विरुद्ध हातहतियारसम्बन्धी खरखजना मुद्दा दर्ता गरेर अनुसन्धान प्रक्रिया अघि बढाएको छ ।