बसमा चढ्ने क्रममा लडेर एक पुरूषको मृत्यु

पश्चिम नवलपरासीमा बस चढ्नेक्रममा खस्दा एक जनाको मृत्यु भएको छ ।

शनिबार दिउँसो सवा २ बजे प्रतापपुर गाउँपालिका-९ खैरेनी स्थित त्रिबेणीदेखि बर्दघाट जाँदै गरेको लु १ ख ३६६३ नं. को बसमा सोही ठाउँमा बस्ने ३४ वर्षीय जगदीश थारु चढ्ने क्रममा लडेर घाइते भएका थिए ।

जिल्ला प्रहरी कार्यालयका डिएसपी रेशम बोहराका अनुसार उनको स्थानीय मेडिकलमा सामान्य उपचार गराएर भैरहवा मेडिकल कलेज रूपन्देहीमा रिफर गरिएको थियो ।

उपचारकै क्रममा अपराह्न ४ बजे मृत्यु भएको डिएसपी बोहराले बताए । बस र बस चालकलाई प्रहरीले नियन्त्रण लिएको छ । शव पोष्टमर्टमका लागि पृथ्वी चन्द्र अस्पतालमा लगिएको छ ।