एकीकृत समाजवादीका केन्द्रीय सदस्य शाही एमाले प्रवेश

नेकपा एकीकृत समाजवादीका केन्द्रीय सदस्य जंगबहादुर शाही नेकपा एमाले प्रवेश गरेका छन् । मंगलबार दैलेखमा एक कार्यक्रमकाबीच उनी एमाले भित्रिएका हुन् । शाहीलाई एमाले स्थायी कमिटी सदस्य यामलाल कँडेल, पोलिटब्यूरो सदस्य लक्ष्मीप्रसाद पोखरेल, केन्द्रीय सदस्य विनोदकुमार शाहले पार्टीमा स्वागत गरे ।

आगामी मंसिर १६ गते दैलेखको महावु गाउँपालिकाको अध्यक्ष पदमा उपनिर्वाचन हुँदैछ । एमाले प्रवेश गरेका शाह ०७४ सालमा एमालेबाट पालिका अध्यक्ष चुनिएका थिए । ०७९ मा एकीकृत समाजवादीबाट अध्यक्षको उम्मेदवार बनेका उनी पराजित भएका थिए । उनलाई यसपटक एमालेले अध्यक्षको उम्मेदवार बनाउने तयारी गरेको छ ।

शाही गत स्थानीय तह निर्वाचनमा पुनः नेकपा एसबाट अध्यक्ष उम्मेदवार बनेर २ हजार २६८ मत पाएका थिए । एमालेका हरिप्रसाद उपाध्यायले २ हजार ५०० मत पाउँदा कांग्रेसका लछुमान गुरुङ २ हजार ९०० मतका साथ विजयी भएका थिए । गुरुङको निधनपछि यहाँ मंसिर १६ मा उपचुनाव हुँदैछ ।