निर्मला पन्तको बलात्कारपछि हत्या घटनाको प्रत्यक्षदर्शी बताउने व्यक्तिसँग सिआइबीले गर्यो सोधपुछ
कञ्चनपुरकी १३ वर्षीया बालिका निर्मला पन्तको बलात्कारपछि हत्या गरिएको घटनाका प्रत्यक्षदर्शी बताउने एक पुरूषलाई प्रहरीको केन्द्रीय अनुसन्धान ब्युरो (सिआइबी)ले सोधपुछ गरेको छ ।
गोरखा घर भई काठमाडौं बस्दै आएका नवराज अर्याललाई सिआइबीले मंगलबार सोधपुछ गरेको ब्युरोका एसपी होबिन्द्र बोगटीले जानकारी दिए ।
प्राइम टाइम टेलिभिजनमा अर्यालले अन्तर्वार्ता दिँदै आफू निर्मलाको हत्या गरिएको घटनाका प्रत्यक्षदर्शी बताएका थिए । नवराजले आफू खानेपानी विभागको सवारी चालक रहेको र कञ्चनपुर पुगेको बेला निर्मलाको बलात्कार हुँदै गरेको प्रत्यक्ष देखेको बताएका थिए ।
प्राइम टाइम टेलिभिजनका सञ्चालक क्रषि धमलासँग सोमबार ‘जनता जान्न चाहन्छ’ भन्ने कार्यक्रममा अन्तर्वार्ता दिँदै निर्मलाका हत्यारालाई कानुनी कठघरामा ल्याउनुपर्ने र आफ्नो सुरक्षाको ग्यारेन्टी गरे बलात्कारका आरोपीबारे सूचना दिने बताएका थिए ।
तीनजनाको समूहले निर्मलाको बलात्कार गरेको उनको दाबी थियो । उनीमाथि सीआईबीले मंगलबार नै सोधपुछ गरेको ब्युरोका एसपी होविन्द्र बोगटीले जानकारी दिए । तर, घटनाको विवरण नै उनले गलत बताउने गरेका छन् । अर्यालको भनाइ सान्दर्भिक नदेखिएको पनि प्रहरीको भनाइ छ ।
सिआइबीले उनीसँग ३/४ घण्टा सोधपुछ गरेपछि कागज गराएर छाडेको थियो । उनलाई बुधबार पनि उपस्थित हुने सर्तमा सिआइबीले छाडेको थियो । तर बुधबार उनी सम्पर्कबिहीन भएका छन् । उनले मोबाइल घरमै छाडेर हिँडेको एसपी बोगटीले बताए ।
‘उहाँको भनाइसँग वास्तविकता मिलेको छैन । हिजो दिनभरमा ३/४ घण्टा सोधपुछ गरेर छाडेका थियौं,’ एसपी बोगटीले भने, ‘घटनाबारे बोलिएका कुराहरू काल्पनिक देखिन्छन् । तथ्यगत कुराहरू केही छैन ।’
निर्मलाको २०७५ साउन १० मा बलात्कारपछि हत्या भएको थियो ।
