एमालेले मंसिर ७ गते काठमाडौँमा शक्ति प्रदर्शन गर्ने

एमालेले मंसिर ७ गते काठमाडौँमा शक्ति प्रदर्शन गर्ने तयारी गरेको छ ।

सत्तारूढ नेपाल कम्युनिष्ट पार्टी (एमाले) का पोलिटब्युरो सदस्य एवं भक्तपुरका इन्चार्ज महेश बस्नेतले काठमाडौँको भृकुटीमण्डपमा प्रधानमन्त्री तथा पार्टी अध्यक्ष केपी शर्मा ओली प्रमुख आतिथ्यतामा शक्ति प्रदर्शन गर्ने बताए ।

बुधबार भक्तपुरको सूर्यविनायकमा पार्टी नगर कमिटीको दोस्रो अधिवेशनबारे जानकारी दिन आयोजित पत्रकार सम्मेलनमा बस्नेतले उक्त शक्ति प्रदर्शनमा उपत्यकाका तीनै जिल्लाका नेता तथा कार्यकर्ताहरूको व्यापक उपस्थिति रहने जनाए ।

बस्नेतले सुतिरहेको बाघलाई साना जनावरहरूले चुनौती दिने गरेको उदाहरण दिँदै एमालेको शक्ति प्रदर्शन ती विरोधी गतिविधिहरूको जवाफका लागि हुने बताए । कार्यक्रममा प्रधानमन्त्री ओलीले विशेष सम्बोधन दिने जानकारी पनि उनले गराए ।