वादी समुदायका घरघरमा पुगे खानेपानीका धारा
नौमूले– घरघरमा खानेपानीका धारा निर्माणसँगै दुल्लु नगरपालिका–१ का वादी समुदाय र तल्लोडुगेश्वर बजारका स्थानीयवासीले शुद्ध पिउने पानी उपभोग गर्न पाउने भएका छन् । सधैँ कर्णाली नदी र लोहोरे खोलाको दूषित पानी पिउँदै आएका उनीहरूले शुद्ध पिउने पानी पाउँदा खुसी व्यक्त गरेका छन् ।
‘अहिले घरघरमा पानी आयो, बल्ल सफा पानी पिउन पायौँ । नभए हाम्रो अवस्था फेद्उनो कर्णाली बग्दो रैगो पानी तिर्खा भन्ने देउडागीत जस्तै थियो’, दुल्लु नगरपालिका–१ की ९० वर्षीया इन्द्रसरा वादीले भनिन् ।
धारा नहुँदा खोलाबाट पानी ल्याउन आधाघण्टा लाग्थ्यो । बर्सातमा झनै धमिलो पानी हुँदा गाउँले काकाकुल भएर बस्थे । ‘एक घण्टा धमिलो पानी बालुवा थिग्रिएपछि पिउँथ्यौँ । प्यास मेटाउन लागि पनि पर्खिनुपर्थ्यो,’ उनले भनिन् ।
घरमा शुद्ध पिउने पानी आएपछि समय बचत भएको देवीसरा वादीले जानकारी दिइन् । ‘बचत भएको समय हामीले सरसफाइ र तरकारीखेतीमा बिताउने गरेका छौँ’, उनले भनिन्, ‘शौचालय नहुँदा झाडी, जङ्गलमा खुल्ला दिसापिसाब गर्नुपर्ने बाध्यता थियो । अब त पानी पनि पायौँ । शौचालय पनि बने, चिन्ता केही छैन ।’
पाँच किलोमिटर टाढा भुवापानी मुहानबाट ल्याइएको खानेपानीबाट मन्दिर, बजार र नमूना बस्ती गरी एक सय १० वटा धारा निर्माण गरिएको प्राविधिक जयबहादुर विष्टले बताए । दुल्लु नगरपालिका र गैरसरकारी संस्थाको साझेदारीमा७० लाख रुपैयाँ लगानीमा धारा र शौचालय निर्माण गरिएको हो ।
शुद्ध पिउने पानी पाए पनि मजदुरी गरेर जहान परिवार पाल्दै आएका वादी समुदाय अधिकांश बेरोजगार छन् । बालुवा निकाल्ने खोलामा क्रसर उद्योग सञ्चालनपछि आफूहरूलाई बेरोजगारी भएको उनीहरूको गुनासो छ ।
पालिकामा प्रधानमन्त्री रोजगार कार्यक्रम र मुख्यमन्त्री स्वरोजगार सञ्चालन भए पनि जानकारी नपाउने गरेको वसन्ता वादीले दुखेसो पोखिन् ।
