मोटरसाइकल दुर्घटना हुँदा दुईजनाको मृत्यु

पूर्व–पश्चिम राजमार्गस्थित मोरङको उर्लाबारी–३ नयाँ मंगलबारेमा बिहीबार साँझ मोटरसाइकल दुर्घटना हुँदा दुईजनाको मृत्यु भएको छ । अरु दुईजना गम्भीर घाइते भएका छन् । इलाका प्रहरी कार्यालय उर्लाबारीले दिएको जानकारी अनुसार पूर्व पश्चिम राजमार्गमा पूर्व जाँदै गरेको प्रदेश १-०-०५० प ८४०६ नम्बरको बाइक र पश्चिम जाँदै गरेको प्रदेश १-०२-०४३ प ९२२६ नम्बरको मोटरसाइकल ठोक्किएका हुन्।

दुर्घटनामा मोरङ पथरी शनिश्चरे नगरपालिका-५ का ३३ वर्षीय दीपक धिमाल र कानेपोखरी गाउँपालिका-४ रमाइलोका २८ वर्षीय किशोर गुरूङको मृत्यु भएको प्रहरीले जनाएको छ।

घाइते भएका धिमालको उपचारका क्रममा उर्लाबारीकै अरनिको अस्पताल र गुरूङको मदन भण्डारी अस्पताल ट्रमा सेन्टरमा मृत्यु भएको हो।

त्यस्तै मोटरसाइकलमा सवार कानेपोखरी-४ का २६ वर्षीय अमृत लिम्बू र पथरी शनिश्चरे-५ का ३८ वर्षीय विष्णु धिमाल घाइते छन्।

उनीहरूलाई उपचारका लागि झापाको बिर्तामोडस्थित बिएन्डसी अस्पताल लगिएको छ। दुवै मोटरसाइकल तीव्र गतिमा रहेका कारण अनियन्त्रित भएर ठोक्किएको प्रहरीको भनाइ छ।