काठमाडौँ आउँदै गरेको कन्टेनर चुरियामाई उकालोमा पल्टिँदा पूर्वपश्चिम राजमार्ग अवरुद्ध

मकवानपुर र बाराको सिमाना हेटौँडा उपमहानगरपालिका-१५, चुरियामाईमा कन्टेनर पल्टिँदा पूर्वपश्चिम राजमार्ग अवरुद्ध भएको छ ।

वीरगंजबाट काठमाडौँ जाँदै गरेको मधेस प्रदेश ०३-००१ ख ६७३८ नम्बरको मोबिल लोड गरिएको कन्टेनर आज बिहान १०स्३० बजेतिर अनियन्त्रित भई सडकमा पल्टिएको हो । कन्टेनर पल्टिँदा सडक पूर्णरुपमा बन्द भएको छ ।

दुर्घटनामा गाडी चालक मकवानपुरको मनहरी गाउँपालिका-६ निवासी करिब ३० वर्षीय महेश मोक्तान घाइते भएका छन् । उनको दाहिने हातमा चोट लागेको मकवानपुर प्रहरी प्रवक्ता, डीएसपी श्यामु अर्यालले जानकारी दिए ।

चुरियामाईको उकालोमै कन्टेनर पल्टिएकाले वैकल्पिक सडक प्रयोग गरेर आउ–जाउ गर्ने अवस्था पनि छैन । कन्टेनरलाई पन्छाएर सडक खुलाउने प्रयास भइरहेको जिल्ला ट्राफिक प्रहरीले जनाएको छ ।