त्रिविका विद्यार्थीलाई एनपिएलको टिकटमा पचास प्रतिशत छुट

त्रिभुवन विश्वविद्यालमा अध्ययनरत विद्यार्थीहरूले सिद्धार्थ बैंक नेपाल प्रिमियर लिग (एनपिएल)को टिकटमा पचास प्रतिशत छुट पाउने भएका छन्।

कीर्तिपुरस्थित त्रिवि मैदानमा शनिबारदेखि सुरू हुने एनपिएल हेर्न त्रिभुवन विश्वविद्यालयका विद्यार्थीहरूलाई साधारणतर्फको टिकटमा पचास प्रतिशत छुट दिने सहमति भएको नेपाल क्रिकेट संघले जनाएको छ।

क्यानका प्रवक्ता छुम्बी लामाले जारी गरेको विज्ञप्ति अनुसार क्यान र त्रिविबीच भएको सम्झौताबमोजिम हाल कामय गरिएको साधारणतर्फको टिकट खरिदमा त्रिविका विद्यार्थीहरूका लागि पचास प्रतिशत छुटको व्यवस्था गरिएको हो।

एनपिएलको उद्घाटनमा शनिबार विराटनगर किंग्स र जनकपुर बोल्ट्सबीच हुने खेलको टिकट भने यसअघि नै बिक्री भइसकेको छ।