सशस्त्र प्रहरी नायब निरीक्षकको मृत्यु प्रकरणमा दुईजना पक्राउ

स्कोरपियोको ठक्करबाट सिरहामा सशस्त्र प्रहरी नायब निरीक्षक (सई)को मृत्यु प्रकरणमा दुईजनालाई पक्राउ गरिएको छ । अनुसन्धानका क्रममा सोधपुछका निम्ति दुईजनालाई नियन्त्रणमा लिइएको प्रहरीले जनाएको छ ।

उनीहरूलाई आइतबार पक्राउ गरी आवश्यक बयान लिने कार्य भइरहेको जिल्ला प्रहरी कार्यालय सिरहाका प्रमुख एवं प्रहरी उपरीक्षक रमेश पण्डितले जानकारी दिए । घटनामा प्रयोग गरिएको गाडी र संलग्न व्यक्तिको पनि पहिचान भइसकेको उनले बताए ।

नम्बर नखुलेको स्कोरपियोको ठक्करबाट नेपाल–भारत सीमानजिकै बडियारपट्टी, कचनारीको भित्री सडकमा गस्तीमा रहेका सशस्त्र प्रहरी नायब निरीक्षक ४८ वर्षीय लक्ष्मणप्रसाद यादवको आइतबार बिहान मृत्यु भएको थियो । ठक्कर दिएर उक्त स्कोरपियो भारततर्फ फरार भएको थियो ।

प्रादेशिक अस्पतालमा यादवको शव परीक्षण गरी आइतबार साँझ नरहा गाउँपालिका–४ स्थित घरमा ल्याएर अन्त्येष्टि गरिएको थियो ।

यसअघि, अवैध मदिरा ओसारपसार गरिरहेको गाडीलाई रोक्न खोज्दा योजनाबद्ध रूपले किचेर हत्या गरिएको आरोप लगाउँदै आफन्तसहित स्थानीय बासिन्दाले पूर्व–पश्चिम सडकको लहानखण्ड अवरुद्ध गरेका थिए ।