श्रीमतीको हत्या गरेको आरोपमा ३७ वर्षीय रसाईली पक्राउ

श्रीमतीको हत्या गरेको आरोपमा धरानबाट आज एक जना पक्राउ परेका छन् । पक्राउ पर्नेमा धरान उपमहानगरपालिका–२ पुरानो बजार डेरा गरी बस्ने भोजपुरको अरूण गाउँपालिका–६ जरायोटार घर भएका ३७ वर्षीय अमृत रसाईली छन् ।

प्रहरीका अनुसार, श्रीमती २८ वर्षीया सम्झना रसाईलीको हत्या गरेको आरोपमा उनलाई पक्राउ गरिएको हो । अमृतले वादविवादको क्रममा खुकुरी प्रहार गर्दा सम्झनाको घटनास्थलमै मृत्यु भएको खबर प्राप्त हुनासाथ इलाका प्रहरी कार्यालय धरानबाट खटिएको प्रहरीले उनलाई पक्राउ गरेको जनाइएको छ ।

घटनाबारे प्रहरीले आवश्यक अनुसन्धान गरिरहेको जनाएको छ ।