बुटवलमा बिरामी बोकेको बोलेरो जिप दुर्घटना हुँदा दम्पतीसहित तीन जनाको मृत्यु

पूर्वपश्चिम राजमार्गअन्तर्गत रुपन्देहीको बुटवलस्थित तिनाउ पुलनजिकै बोलेरो जिप दुर्घटना हुँदा दम्पतीसहित ३ जनाको मृत्यु भएको छ ।

इलाका प्रहरी कार्यालय बुटवलका प्रहरी नायब उपरीक्षक (डीएसपी) विजयराज पण्डितका अनुसार शुक्रबार राति साढे १२ बजेतिर लु ३ च २४८० नम्बरको बोलेरो जिप तिनाउ पुल नजिकै दुर्घटना भएको हो ।

दुर्घटनामा बुटवल–१२ नयाँ गाउँका ७१ वर्षीय तिलकराम खनाल, उनकी श्रीमती ६७ वर्षीया गौरी खनाल र जिपका चालक ३२ वर्षीय हरि न्यौपानेको मृत्यु भएको डीएसपी पण्डितले जानकारी दिए । जिपका चालक पनि बुटवल-१२, नयाँ गाउँमै बस्थे ।

प्रहरीका अनुसार दम रोगी गौरी खनाललाई उपचारका लागि घरबाट लुम्बिनी प्रादेशिक अस्पताल ल्याउने क्रममा जिप दुर्घटनामा परेको हो ।

पुल क्रस गरिसकेपछिको मोडमा जिप दुर्घटनामा परेको डीएसपी पण्डितले बताए । उक्त जिप अर्घाखाँची क्याटरिङको रहेको बताइएको छ । शव पोष्टमार्टमा लागि लुम्बिनी प्रादेशिक अस्पतालमा राखिएको छ ।