पिताको निधनपछि छोरीलाई देशकै कान्छी वडा सभापति बनाएर सम्मान

नेपाली काँग्रेसको १४ औँ महाधिवेशनको पहिलो चरणमा शुक्रवार भएको वडा स्तरीय चुनावमा दैलेखबाट १९ वर्षीया किशोरी स्वस्तिका महत वडा सभापतिमा सर्वसम्मत चुनिएकी छन् ।

जिल्लाको दुल्लु नगरपालिका–३ मा निर्वाचित भएकी महतलाई काँग्रेस राजनीतिमा सक्रिय स्वः जिल्ला उपसभापति भूपेन्द्रजंग महतको सम्मानमा सर्वसम्मत चुनिएको नेपाल दलित सङ्घका जिल्ला सभापति दीपक विकले बताए । सम्भवतः उनी देशकै कान्छी वडा सभापतिको रूपमा चयन भएकी छन् ।

देशकै कान्छी वडा सभापति स्वस्तिका काँग्रेसको १३ औँ महाधिवेशनमा निर्वाचित दैलेख जिल्ला उपसभापति भूपेन्द्रजङ्ग महतकी छोरी हुन । दुई वर्ष अघि स्वास्थ्य उपचारको क्रममा दिल्लीमा महतको निधन भएको थियो ।

उपसभापति स्व. भूपेन्द्रप्रति सद्भावना जनाउँदै काँग्रेसले स्वस्तिकालाई सर्वसम्मतिबाट वडा सभापति बनाएको विकले बताए । यस्तै महतकी आमा अर्थात् पूर्व उपसभापति भूपेन्द्रकी धर्मपत्नी अरुणा महतलाई क्षेत्रीय प्रतिनिधि चयन गरिएको छ ।

क्षेत्रीय प्रतिनिधिले काँग्रेसको निर्वाचन क्षेत्र स्तर, जिल्ला नेतृत्व र केन्द्रीय महाधिवेशन प्रतिनिधि तथा महाधिवेशन सदस्यका उम्मेदवारलाई मतदान गर्न र आफैँ उम्मेदवार बन्न पाउँछन् । देशकै कान्छी वडा सभापति स्वस्तिकाले आफ्नो बुबाले राजनीतिमा क्रियाशीलता छँदै अकालमा मृत्युवरण गरेर गर्न नपाएका राजनीतिक सेवा गर्ने अठोट रहेको बताएकी छन् ।

उनले मिलेसम्म आफू आउँदो स्थानीय चुनावमा वडाध्यक्षको उम्मेदवार बन्ने इच्छा जनाएकी छन् । तर कानुनअनुसार पालिकाको उम्मेदवार हुन २१ वर्ष पुगेको हुनुपर्ने उमेर हद तोकिएको छ ।