सलमान खान वैशाख ३ गते काठमाडौं आउने
भारतीय सिने स्टार सलमान खान वैशाख ३ गते नेपाल आउने भएका छन् ।
ओडीसी इन्टरटेनमेन्ट काठमाडौंको दशरथ रंगशालामा आयोजना गरेको एक सांगीतिक कार्यक्रममा सहभागी हुन सलमानसहितका कलाकार नेपाल आउने भएका हुन् ।
सलमानका साथमा नायिका ज्याकलिन फर्नान्डिज, प्रभु देवा लगायतका कलाकार उपस्थित हुने आयोजकले जानकारी दिएको छ ।
ती कलाकारलाई सम्झौताअनुसार भुक्तानी गर्नुपर्ने कूल रकममध्ये ४ करोड रुपैयाँ पारिश्रमिक पठाउन ओडीसीले बुधबार पर्यटन मन्त्रालयबाट राष्ट्र बैंकमा भुक्तानी पठाउन सिफारिस पत्र लिएको छ ।
यसअघि २०७४ फागुन २६ गते सलमानसहितका कलाकारले काठमाडौंमा दबंग रिलोडेड कार्यक्रममा भाग लिने जनाइएको थियो तर, विवादले उक्त कार्यक्रम स्थगित भयो । सोही सम्झौताअनुसार अब भने सलमान आउने पक्का भएको हो ।
सलमानको कार्यक्रमले नेपालमा कोरोनाको कारणले थिलथिलिएको पर्यटनमा टेवा पुग्ने विश्वास गरिएको छ ।
