गत बुधबार आफ्नै घरमा मृत फेला परेकी रूकुम पश्चिमको सानीभेरी गाउँपालिका–४ लामाचौरकी ४९ वर्षीया शुसिला मल्लको हत्यामा संलग्न एक जनालाई प्रहरीले पक्राउ गरेको छ ।
जिल्ला प्रहरी कार्यालयले पक्राउ परेका चौरजहारी नगरपालिका–११ माथिल्लो सार्केनाका २३ वर्षीय प्रेम मल्ललाई आइतबार पत्रकार सम्मेलन गरी सार्वजनिक गरेको हो ।
गत बुधबार बिहान ८:१५ बजेको समयमा मल्ल आफ्नै घरको तल्लो तलाको पश्चिमतर्फको कोठामा मृत फेला परेकी थिइन् । यही सुचनाका आधारमा अनुसन्धान गर्दा प्रेम मल्लको संलग्नता रहकेो खुलेको जिल्ला प्रहरी प्रमुख नवराज पोखरेलले जानकारी दिए ।
शुसिला हत्याको अनुसन्धानका लागि जिल्ला प्रहरी कार्यालयका डिएसपी पोखरेलको कमाण्डमा प्रदेश प्रहरीसहितको विशेष अनुसन्धान टोली परिचालन गरेको थियो । प्रहरीका अनुसार मृतक शुसिला मल्ल र प्रतिवादी प्रेम मल्लबीच डेढ वर्षदेखि सम्बन्ध भएपनि विवाहको विषयमा कुरा नमिलेपछि विवाद हुँदा हत्या भएको हो ।
डिएसपी पोखरेलका अनुसार प्रेम अविवाहित हुन् । सुशीलाका श्रीमानको करिब १९ वर्ष पहिले नै मृत्यु भइसकेको थियो । सुशीलाका तीन छोराहरूमध्ये दुई छोरा तेस्रो मुलुक र रोजगारीको सिलसिलामा कान्छा छोरा भारतमा छन् । सुशीला घरमा जेठी बुहारीसँगै बस्दै आएकी थिइन् ।
गत मंगलबार मध्यरातितिर आफूलाई भेट्न आएका प्रेमलाई सुशीलाले गाउँ घरमा हल्ला भएको र सबैले थाहा पाएको भन्दै आफूसँग बिहे गर्न भनेर दबाब दिन थालिन् । प्रेमले त्यो कुरा आफू छोरा उमेरको भएको हुँदा बिहे गर्न नसक्ने भन्दै नकारे । त्यहीबीच उनीहरूको विवाद सुरू भएको प्रहरीले जनाएको छ । विवाद बढ्दै गएपछि उनीहरू आपसमा भिड्न थालेका थिए ।
प्रेमले त्यहीबेला नजिकैको रोटी पकाउने तावा, सिलौटो, लौरो, चम्चा लगायका वस्तुले आक्रमण गरेर हत्या गरेको प्रहरीले जनाएको छ ।
