फ्रान्सका समर्थकलाई देखाउन ‘विवादास्पद सेलिब्रेशन’ गरेँ : मार्टिनेज

एजेन्सी – फिफा विश्वकपमा गोल्डेन ग्लभ्स विजेता अर्जेन्टिनाका गोलकिपर एमिलियानो मार्टिनेजले फ्रान्स समर्थकले गिज्याएकाले ‘विवादास्पद सेलिब्रेशन’ गरेको बताएका छन् । उनका अनुसार उनले उक्त विवादास्पद सेलिब्रेशन गर्नुको पछाडि फ्रान्सका समर्थक रहेका हुन्। ‘फ्रेन्चहरूले मलाई गिज्याएकाले मैले त्यसो गरेँ, मेरो अगाडि घमण्ड टिक्दैन’ मार्टिनेजले भने।

एउटा गोलकिपरले पाउने विश्वकै प्रतिष्ठित पुरस्कार पाएर त्यसको अपमान गरेको भन्दै विश्वकप सकिएको दुई दिनपछि पनि विरोध भइरहेको छ। तर यसबारे मार्टिनेजले आफ्नो धारणा अघि सारेका छन्।

यस्तै मार्टिनेजले आफ्नो गोल्डेन ग्लभ आफ्नो परिवारप्रति समर्पित गरेका छन्। यी सबै विवाद र चर्चाका बावजुद मार्टिनेजको स्पोर्टम्यानशिपको पनि हाल चर्चा भइरहेको छ। खेल सकिएपछि मार्टिनेज फ्रान्सका स्टार स्ट्राइकर किलियन एम्बाप्पे भएको स्थानमा पुगेर उनलाई सान्त्वना दिएको दृश्य पनि यतिबेला भाइरल हुँदै गएको छ।