कार दुर्घटनामा भारतीय क्रिकेटर ऋषभ पन्त गम्भीर घाइते

काठमाडौँ — भारतीय क्रिकेटर ऋषभ पन्त कार दुर्घटनामा परेका छन्। शुक्रबार दिल्ली–देहरादुन राजमार्गमा डिभाइडरमा ठोक्किँदा ऋषभ सवार कार दुर्घटना भएको हो।पन्तको अवस्थामा गम्भीर रहेको भारतीय सञ्चार माध्यमहरुले जनाएका छन् ।

डिभाइडरमा ठोक्किएपछि कारमा आगलागी भएको थियो । कार जलेर पूर्ण रूपमा नष्ट भएको समाचार संस्था एएनआईले जनाएको छ । टाउको र खुट्टामा चोट लागेका ऋषभलाई सुरुमा हरिद्वारको रुड्कीस्थित एक अस्पतालमा उपचारका लागि भर्ना गरिएको थियो । अहिले उनलाई देहरादुनको म्याक्स अस्पताल सारिएको छ ।

ऋषभ आफैले मर्सिडिज कार चलाएको बताइएको छ । २५ वर्षीय ऋषभ यही जनवरी ३ देखि सुरु हुने श्रीलंकासँगको ट्वान्टी–२० र एकदिवसीय शृंखलाका लागि टोलीमा अटाएका थिएनन् ।