‘छक्कापञ्जा ४’ को गीत ‘दर्शन सलाम’ सार्वजनिक

‘छक्कापञ्जा ४’ को पहिलो गीत सार्वजनिक भएको छ । आगामी फागुन १९ गतेदेखि देशभर प्रदर्शनको तयारीमा रहेको फिल्मको ‘दर्शन सलाम’बोलको गीत सार्वजनिक गरिएको हो । लोक शैलीको उक्त गीतमा स्वस्तिमा खड्का, दीपाश्री निरौला, दीपकराज गिरी, राज आचार्यलगायतका कलाकारले कम्बर मर्काएका छन् ।

फिल्मका महत्वपूर्ण दृश्यांश समेटिएको गीतमा गाउँको चुनावको सन्दर्भ र परिवेश समेटिएको छ । फिल्मको कथावस्तु, चरित्र चित्रण र केन्द्रीय द्वन्द्वको खुलासा पनि यो भिडियोमार्फत भएको छ ।

सार्वजनिक गीत डेभिड शंकर र सहिमा श्रेष्ठले गाएका छन् । राजेन्द्र थापाले लेखेको गीतमा दीपक शर्माको संगीत सुन्न सकिन्छ । चुनावको पृष्ठभूमिमा तयार पारिएको गीतमा कविराज गहतराजको कोरियोग्राफी छ।

यही फिल्ममार्फत हेमराज बिसी दीपक–दीपाको ब्यानरमा भित्रिएका छन् । नरेन्द्र मैनालीले छायांकन गरेको फिल्ममा केदारप्रसाद घिमिरे र निर्मल शर्मा कार्यकारी निर्माता हुन्।

आमा सरस्वती मुभिजको ब्यानरमा निर्माण भएको फिल्ममा दीपकराज गिरी, दीपाश्री निरौला, बेनिशा हमाल, मलिना जोशी, केदारप्रसाद घिमिरे (माग्ने बूढा), राज आचार्यलगायत कलाकारले अभिनय गरेका छन्।