भद्रपुर गोल्डकप : पुलिसलाई हराउँदै चर्च ब्वाइज क्वार्टरफाइनलमा

इलाम : विभागीय टोली नेपाल पुलिस क्लबलाई हराउँदै चर्च ब्वाइज युनाइटेड भद्रपुर झापा गोल्डकपको क्वार्टरफाइनलमा प्रवेश गरेको छ।

ए डिभिजन लिगको नवप्रवेशी टोली चर्च ब्वाइजले पुलिसमाथि ३–० गोल अन्तरको जित निकालेको हो। चर्च ब्वाइजलाई क्वार्टरफाइनल प्रवेश गराउन आशिष चौधरीले २ गोल र गगनदिप सिंहले १ गोल गरे।

खेलको ४० औ मिनेटमा गगनदिपले चर्चब्वाइजलाई सुरुवाती अग्रता दिलाए। पहिलो हाफमा १–० ले अग्रता कायम गरेको चर्च ब्वाइजले दोश्रो हाफमा थप २ गोल गर्न सफल भयो। ५६ औ मिनेटमा आशिषले टिमका लागि दोश्रो गोल गरे।

४ मिनेट नबित्दै आशिषले व्यक्तिगत दोश्रो गोल गरेपछि चर्च ब्वाइज ३–० गोल अन्तरको जितसहित क्वार्टरफाइनल पुगेको हो। २ गोल गरेका आशिष म्यान अफ दि म्याच घोषित भए।

मंगलबार प्रतियोगिताको पहिलो क्वार्टरफाइनल खेलमा घरेलु टोली भद्रपुर ब्लेजर्स र संकटा एफसीबीच प्रतिस्पर्धा हुनेछ। भद्रपुर पहिलो प्रि–क्वार्टरफाइनल खेलमा पाहुना टोली जयगाउँ एफसीमाथि जित निकाल्दै क्वार्टरफाइनल पुगेको हो।