निश्चल बस्नेतको ‘दिमाग खराब’ को पोस्टर सार्वजनिक

आगामी कात्तिक २४ गतेबाट सार्वजनिक प्रदर्शनमा आउने फिल्म ‘दिमाग खराब’को पहिलो पोस्टर सार्वजनिक भएको छ । फिल्मको प्रचार प्रारम्भ गर्दै निर्माण टिमले पोस्टर सार्वजनिक गरेको हो ।

सार्वजनिक पोस्टरमा कलाकारहरूको ‘क्यारेक्टर लुक्स’ प्रस्तुत गरिएको छ । पोस्टरका कोही कलाकार निराश छन् त कोही घाइते अवस्थामा देखिएका छन् । अभिनेत्री स्वस्तिमा भने विवाहित महिलाको रूपमा देखिएकी छन् ।

‘लुट’बाट सेलिब्रेटी बनेका निश्चल बस्नेतको निर्देशन रहेको फिल्म सिनेमा आर्ट्स र ब्ल्याक हर्स पिक्चर्सको संयुक्त निर्माणमा बनेको हो ।

आकाश बरालको पटकथा, सुसन प्रजापतिको छायांकन, निमेष श्रेष्ठको सम्पादन, जयन के बाइबा र बाबुल गिरीको संगीत तथा रोहित शाक्यको ब्याकग्राउन्ड स्कोर रहेको फिल्ममा दयाहाङ राई, खगेन्द्र लामिछाने, स्वस्तिमा खड्का, अर्पण थापा, विजय बराल र सुमन कार्कीलगायतका कलाकारको अभिनय रहेको छ ।

सुरज बम ठकुरी कार्यकारी निर्माता र रौनक बिक्रम कँडेल निर्माता रहेको फिल्म जनता र शक्तिको कथामा केन्द्रित रहेको बताइएको छ ।