काभा पुरुष भलिबल कपको उपाधि घरेलु टिम श्रीलंकालाई
सेन्ट्रल एसियन भलिबल एसोसिएसन (काभा) पुरुष भलिबल च्यालेन्ज कपको उपाधि घरेलु टिम श्रीलंकाले जितेको छ ।
आइतबार भएको खेलमा उज्वेकिस्तानलाई ३–० को सोझो सेटमा पराजित गर्दै श्रीलंकाले उपाधि जितेको हो ।
श्रीलंकाको कोलम्बोस्थित सुगाथादास इन्डोर रंगशालामा सम्पन्न खेलमा घरेलु टिमले २५–१४, २५–१८, २५–२३ ले आफ्नो पक्षमा पारेको थियो ।
आइतबार नै भएको अर्को खेलमा साउदी अरेबियालाई २५–१४, २५–१६, २५–१८ ले पराजित गर्दै तेस्रो स्थान अफगानिस्तानले हासिल गर्यो ।
प्रतियोगितामा नेपालले पाँच खेल खेल्दा दुई जित र तीन हारको नतिजा निकाल्यो । नेपालले बंगालादेशलाई ३–१ र अफगानिस्तानलाई ३–२ को सेटमा हराएको थियो । यस्तै, नेपाल श्रीलंका र उज्वेकिस्तानसँग समान ३–० र साउदी अरेबियासँग ३–२ को सेटमा पराजित भएको थियो ।
प्रतियोगितामा नेपालसँगै घरेलु टिम श्रीलंका, बंगलादेश, अफगानिस्तान, साउदी अरेबिया र उज्वेकिस्तान गरी ६ टिमको सहभागिता थियो ।
