६ देशमा छायांकन गरिएको विल्सनको ‘त्यो पल’ सार्वजनिक

विल्सन विक्रम राईको नयाँ गीत सार्वजनिक भएको छ । विल्सनको शब्द रहेको गीतमा भिषण मुकारुङको स्वर छ । ‘त्यो पल’ बोलको गीतमा संगीत तोरेम्पाहाङ राईले गरेका छन् ।

मन मिल्ने साथीसँगको बिछोडलाई गीतले देखाएको छ । मिलनको क्षण नजिकिँदै गर्दा आफैँलाई लिन आउँदा साथीले ज्यान गुमाएको वियोगान्त कथा गीतले समेटेको छ ।

गीतको भिडियोमा विल्सनसँगै गौरव पहारी, उदय सुब्बा, विशाल लिम्बू, इन्द्र खरेल, वीरबहादुर राईलगायत छन् ।

विल्सन विक्रमले निर्देशन गरेको भिडियो छायांकन नेपालसँगै अमेरिका, कोरिया, दुवई, कुवेत र स्कटल्यान्डमा खिचिएको हो ।