इन्दु बर्मा बनिन् राष्ट्रिय महिला क्रिकेट टोलीको नयाँ कप्तान

राष्ट्रिय महिला क्रिकेट टोलीको कप्तान परिवर्तन भएको छ । नेपाल क्रिकेट संघ (क्यान)ले इन्दु बर्मालाई नयाँ कप्तानको जिम्मेवारी दिएको हो । यसअघि राष्ट्रिय महिला टोलीको कप्तानी रुविना क्षेत्रीले गर्दै आएकी थिइन् ।

रुविना टिममा परे पनि हङकङमा आयोजना हुने टी-२० सिरिजको कप्तानी इन्दुले गर्ने क्यानले जानकारी दिएको छ ।

त्यस्तै टोलीमा उपकप्तान विन्दु रावल, रुविना क्षेत्री, सीता राना मगर, अश्मिना कर्माचार्य, काजोल श्रेष्ठ, कन्चन श्रेष्ठ, सोमु विष्ट, पूजा महतो, रोमा थापा, संगीता राई, खुसी डंगोल, सम्झना खड्का र सोनी पाख्रिन रहेका छन् ।

हङकङको आयोजनामा नोभेम्बर १५ देखि १९ सम्म हुने चार देशीय टी-२० सिरिज खेल्न टोली त्यसतर्फ प्रस्थान गर्नेछ । नेपालले कात्तिक २९ गते तान्जानिया, कार्तिक ३० गते हङकङ र मंसिर २ मा जापानसँग खेल्नेछ । फाइनल र तेस्रो स्थानको खेल मंसिर ३ मा हुनेछ ।