सन्यासपछि पहिलो पटक क्रिकेट खेल्दै पारस खड्का
नेपाल क्रिकेट संघ (क्यान) का सचिवसमेत रहेका राष्ट्रिय क्रिकेट टिमका पूर्व कप्तान पारस खड्का पुन मैदानमा देखिने भएका छन् । खड्का सन्यासपछि पहिलो पटक नेपालमा क्रिकेट खेल्न उत्रने भएका हुन् ।
रुपन्देहीस्थित तिलोत्तोमामा निर्माणाधिन एक्स्ट्राटेक ओभल क्रिकेट मैदानको उद्घाटन कार्यक्रममा हुने मैत्रीपूर्ण क्रिकेट प्रतियोगितामा पूर्व कप्तान खड्काले खेल्न लागेका हुन् । उद्घाटनका लागि ४ टोलीबीच टि(२० प्रतियोगिता हुने कार्यक्रम रहेको छ । उद्घाटन फाल्गुन १४ गते एक्स्ट्राटेक मैदानमा नै हुनेछ ।
नेपालको पहिलो अन्तर्राष्ट्रिय खेल खेलेको १९९६ को टोली, रुपन्देही लेजेन्ड्स, सन् २०१४ को टि(२० विश्वकप खेलेको टोली र रेस्ट अफ नेपाल गरेर ४ टोलीले सहभागिता जनाउनेछन् । पूर्व कप्तान खड्काले २०१४ टोलीको कप्तानी गर्नेछन् ।
क्रिकेटबाट सन्यास घोषणा गरेयता क्रिकेट मैदानमा नदेखिएका पारसले आफू सन्यासपछि पहिलो पटक मैदानमा उत्रन लागेको बताए ।
खड्का नेपाली क्रिकेट टिमका सर्वाधिक सफल क्रिकेट कप्तान हुन् । क्रिकेटबाट सन्यास लिएपछि उनी क्यानको बागमती प्रदेश अध्यक्ष हुँदै केन्द्रीय सचिवको जिम्मेवारीमा पुगेका छन् ।
