साउदीमा अत्यधिक गर्मीका कारण १४ हजयात्रीको मृत्यु

साउदी अरबमा हजका क्रममा अत्यधिक गर्मीका कारण जोर्डनका कम्तीमा १४ नागरिकको मृत्यु भएको छ ।

जोर्डनको विदेश मन्त्रालयले आफ्ना १४ नागरिकको मृत्यु ‘अत्यधिक गर्मीका कारण हिटस्ट्रोकका कारण’ भएको जनाएको छ । साथै १७ जना बेपत्ता भएको बताएको छ ।

बेपत्ताहरूको खोजी जारी रहेको अधिकारीहरूले बताएका छन् । एएफपी समाचार एजेन्सीका अनुसार इरानी रेड क्रिसेन्टले पाँचजना इरानी हज तीर्थयात्रीको पनि मृत्यु भएको पुष्टि गरेको छ तर उनीहरूको मृत्यु कसरी भयो भन्ने खुलाएको छैन ।

हज संसारको सबैभन्दा ठूलो धार्मिक समारोहमध्ये एक हो । साउदी अधिकारीका अनुसार यो वर्ष १८ लाखभन्दा बढीले यसमा भाग लिइरहेका छन् ।

यस हप्ता साउदीमा तापक्रम ४६ डिग्री सेल्सियस नाघेको छ, जसले गर्दा विशेष गरी वृद्धवृद्धाहरूका लागि गाह्रो भइरहेको छ।