गण्डकी विश्वविद्यालयले पहिलोपटक एआई पढाउँदै, विद्यार्थीलाई कामसहित २० हजार प्रोत्साहन भत्ता

गण्डकी विश्वविद्यालयले एआई अर्थात् कृतिम बौद्धिकता विषय पढाउने भएको छ । विश्वविद्यालयले कम्प्यूटर इन्जिनियरिङ विषयको स्नातकोत्तर (मास्टर्स अफ कम्प्यूटर इञ्जिनियरिङ– एमआईटी) अन्तर्गत नै एआई (मास्टर अफ इन्फर्मेसन टेक्नोलोजी आर्टिफिसियल इन्ट्लीजेन्स) अध्यापन गराउन लागेको हो ।

विद्यार्थीका लागि निकै सीमित कोटा बढीमा २० खुल्ने छ । स्नातकोत्तर तहमा बीएस्सी, इन्जिनियरिङ र आईटी सम्बद्ध विषय पढेकाहरूले मात्र एमआईटी एआई पढ्न पाउने छन् । यो विषय पढ्ने विद्यार्थीहरूले रकम तिर्नुपर्दैन । बरु विश्वविद्यालयले नै मासिक २० हजार रुपैयाँ विद्यार्थीलाई दिनेछ ।

नयाँ विषय र नयाँ मोडालिटीमा यो कक्षा सञ्चालन हुने छ । कुलपति गणेशमान गुरुङले गण्डकी एआई अध्यापन गराउने नेपालको मात्र नभएर एसियाकै पहिलो विश्वविद्यालय भएको दाबी गरे । उनका अनुसार पठन पाठन चाहिँ चालु अंग्रेजी वर्षको सेप्टेम्बर महिनाबाट हुनेछ । उनले इच्छुक विद्यार्थीहरूलाई सो विषय पढ्न आग्रह पनि गरे ।

चार सेमेस्टरमा यो विषयको अध्ययन हुने विश्वविद्यालयका रजिस्ट्रार कैलाश तिमिल्सिनाले बताए ।

यो विषय सुरु भएसँगै विश्वविद्यालयले विभिन्न आईटी क्षेत्रका कम्पनीहरूसँग सहकार्य गर्नेछ । उनीहरूको आवश्यकता अनुसार विद्यार्थीहरूले अध्ययनबाहेक काम पनि गर्नेछन् । सोही कामबापत उनीहरूले मासिक २० हजार रुपैयाँ पाउने तिमिल्सिनाले जानकारी दिए ।

निजी र सरकारीलगायत विभिन्न क्षेत्रसँग आवश्यक समन्वय गरिने पनि उनले बताए । विश्वविद्यालयले पाठ्यक्रम तयार गरिसकेको छ । विश्वविद्यालयको महेन्द्रपुलमा रहेको हुलाक भवनमा पढाइ हुनेछ ।

विश्वविद्यालयका डिन कपिल अधिकारीले एमआईटी एआइको आवश्यकता ठानेर नै कार्यक्रम सार्वजनिक गरिएको उल्लेख गरे । विश्वविद्यालयले प्राविधिक विषयलाई प्राथमिकतामा राखेको र एआईको अध्ययन गर्ने विद्यार्थी पछाडी नपर्ने उनको भनाइ छ ।

गण्डकीका सामाजिक विकास तथा स्वास्थ्यमन्त्री विन्दुकुमार थापाले विश्वविद्यालयले थप गरेको नयाँ विषय सार्वजनिक गर्दै प्राविधिक विषयको पढाइले विश्वविद्यालय शैक्षिक बेरोजगार उत्पादन गर्ने थलो मात्र हुन भन्ने गुनासोको सम्बोधन गर्ने बताए ।

बजारको आवश्यकता अनुसारको जनशक्ति तयार हुँदा विदेशिनुपर्ने अवस्थाको अन्त्य हुने मन्त्री थापाले बताए । विदेश नै गएको अवस्थामा पनि प्राविधिक ज्ञान र सिपले दक्ष भएर जाँदा योग्यता अनुसारको काम पाउन सकिने उनको भनाइ छ ।

“अहिलेको अवस्थामा एआईको ठूलो स्कोप छ । गुणस्तरीय शिक्षामा विश्वविद्यालय अघि बढेको छ । विद्यार्थी अब रोजगारीका लागि भौँतारिनुपर्ने अवस्थाको निर्मूल हुनुपर्छ । विश्वविद्यालयले गरेको मेहनतबाट म खुसी छु्,” उनले भने ।

विश्वविद्यालयका कुलपति प्राडा गणेशमान गुरुङले स्नातकबाट मास्टर्स लेबलमा प्रवेश गर्दा बल्ल विश्वविद्यालयको अनुभूति भएको बताए । प्रदेश सरकारले बनाउन लागेको आईटी पार्क विश्वविद्यालयलाई दिएमा विदेशी निकायसँग मिलेर सूचना प्रविधि सम्बन्धमा काम गर्न सकिने उनको भनाइ थियो । दुई वर्ष भन्दा बढी समयपछि मात्रै कार्यक्रम सार्वजनिक भएको जानकारी उनले दिए ।

विश्वविद्यालयले पोखरा ३२ मा आफ्नै संरचना खडा गरी आईटी र फार्मेसीको क्षेत्रमा अध्ययन अध्यापन गराउँदै आएको छ । विश्वविद्यालयले आविष्कार केन्द्रको समेत स्थापना गरेको छ । गण्डकी विश्वविद्यालयमा ५२ जिल्लाका विद्यार्थीको आबद्धता रहेको उनले उल्लेख गरे ।

विश्वविद्यालयको नाममा अहिले ५७६ रोपनी जग्गा छ ।