जहाज दुर्घटना : श्रीमतीलाई अफिसबाट र छोरालाई विद्यालयबाट बोलाएर घुम्न पोखरा लग्दै थिए मनुराज

सौर्य एयरलाइन्सको जहाज दुर्घटनामा एकै परिवारका तीन जनाको मृत्यु भएको छ । सौर्य एयरलाइन्समा प्राविधिक रहेका मनुराज शर्मा उनकी श्रीमती प्रिजा खतिवडा र छोरा अधिराज शर्मा गरी एकै परिवारका तीनको ज्यान गएको हो । मनुराज सौर्यका कर्मचारी हुन भने प्रिजा ऊर्जा मन्त्रालयमा कम्प्युटर अपरेटरका रूपमा कार्यरत थिइन् ।

प्राविधिक मनुराज पोखरा जाने भएपछि श्रीमती प्रिजालाई अफिसबाट र छोरा अधिराजलाई विद्यालयबाट बोलाएर घुम्न पोखरा लग्दै थिए । प्रिजा नेपाल पत्रकार महासंघ सप्तरीका पूर्वअध्यक्ष प्रकाश खतिवडाकी छोरी हुन् ।

बुधबार बिहान ११:११ बजे काठमाडौंबाट पोखरा उडेको सौर्यको जहाज दुर्घटनामा परेको थियो । दुर्घटना हुँदा १८ जनाको मृत्यु भएको छ भने एकजना घाइते छन् ।

३७ वर्षीय क्याप्टेन मनीष शाक्यको उपचार भइरहेको छ । उनको अनुहारमा चोट लागेको छ । उनी बोल्न सक्ने अवस्थामा छन् ।