काभा नेसन्स लिग आजदेखि: उद्घाटन खेलमा नेपाल र श्रीलंका भिड्दै
काभा महिला भलिबल नेसन्स लिग आजदेखि त्रिपुरेश्वरस्थित राष्ट्रिय खेलकुद परिषदको कभर्ड हलमा सुरू हुँदैछ । उद्घाटन खेलमा घरेलु टोली नेपालले श्रीलंकाविरुद्ध खेल्दैछ ।
खेल दिउँसो सवा ३ बजे सुरु हुनेछ । आजै हुने दोस्रो खेलमा भारत र इरान खेल्नेछन् । सो खेल आज साँझ पौने ६ बजे सुरु हुनेछ ।
लगातार दोस्रो पटक घरेलु मैदानमा काभा नेसन्स लिग खेल्न लागेको नेपाली टोली उच्च मनोबलमा छ ।
लिगको दोस्रो खेलमा नेपालले १९ गते शनिबार भारतसँग, साउन २० गते आइतबार इरान र लिग चरणको अन्तिम खेलमा साउन २१ गते सोमबार मालदिभ्ससँग खेल्नेछ ।
पाँच टोली सहभागी लिगको शीर्ष स्थानमा रहने चार टोलीले सेमिफाइनल खेल्नेछन् ।
पहिलो सेमिफाइनलमा अंक तालिकाको शीर्ष र चौथो स्थानमा रहने टोलीले खेल्नेछन् । दोस्रो सेमिफाइनलमा दोस्रो र तेस्रो स्थानमा रहने टोलीले स्पर्धा गर्नेछन् । सेमिफाइनल खेल २२ गते मंगलबार हुनेछ ।
सेमिफाइनलको विजेताले फाइनल खेल्दा पराजित हुने टोलीले तेस्रो स्थानका लागि खेल्नेछन् । फाइनल खेल साउन २३ गते बुधबार हुनेछ ।
