१० खेलाडीमा सीमित स्पेनको स्वीट्जरल्यान्डविरुद्ध जित
यूईएफए नेसन्स लिगअन्तर्गत पहिलो जित निकाल्ने क्रममा स्पेनले स्वीट्जरल्यान्डलाई ४–१ ले पराजित गरेको छ ।
आइतबार राति स्वीट्जरल्यान्डको स्टेड डे जेनेभमा पाहुना टिमलाई जित दिलाउन फाबियन रुइजले दुई गोल गरे । जोसेलु र फेरान टोरेसले समान एक गोल थपे । घरेलु टिमका जेकी अम्डोउनीले एक गोल फर्काएका थिए ।
खेलको चौथो मिनेटमै जोसेलुले गोल गर्दै स्पेनलाई अग्रतामा राखेका थिए त्यसको नौ मिनेटपछि रुइजले गोल गर्दै स्पेनको अग्रता दोब्बर बनाए । ४१औँ मिनेटमा अम्डोउनीले गोल फर्काउँदै घरेलु टिमलाई २–१ को स्थितिमा ल्याए ।
७७औँ मिनेटमा रुइजले दोस्रो गोल गर्दा स्पेनले अग्रतालाई ३–१ मा पुर्यायो । त्यसको तीन मिनेटपछि नै टोरेसले गोल गरेपछि स्पेनले ४–१ को सहज जित निकालेको हो ।
त्यसअघि, खेलको २०औँ मिनेटमा रोविन ले नोमान्र्डलाई रातो कार्ड देखाइएसँगै स्पेन १० खेलाडीमा समेटिएको थियो ।
जितसँगै दुई खेलबाट चार अंक जोडेको स्पेन समूह–४ को दोस्रो स्थानमा उक्लिएको छ । समान खेल खेल्दा पनि अंकविहीन स्वीस टोली पुछारमा छ ।
आइतबार राति नै भएको अर्को खेलमा डेनमार्कले सर्बियालाई २–० ले हरायो । प्रतियोगिताको समूह–४ मै रहेको डेनमार्क लगातार दोस्रो जितसहित शीर्ष स्थानमा उक्लिएको छ । समान खेलबाट एक अंकको सर्बिया चौथो स्थानमा छ ।
