जर्मनीमा आधा भन्दा बढी जनसंख्यालाई कोरोनाविरुद्धको पूरा डोज खोप

जर्मनीको आधा भन्दा बढी जनसंख्यालाई कोरोना भाइरसविरुद्धको पूरा डोज खोप लगाइएको यहाँको स्वास्थ्य मन्त्री जेन्स स्पानले बताएका छन् । युरोपको सबैभन्दा ठूलो अर्थतन्त्रको खोपको अभियानलाई स्वागत गर्दै उनले सो कुरा बताएका हुन् ।

स्पानका अनुसार ४ करोड १८ लाख जर्मन नागरिक हाल पूर्णरुपमा सुरक्षित भएका छन् । जर्मनीको कूल जनसंख्या ८ करोड ३० लाख भन्दा बढी रहेको छ । जर्मनीको आधा जनसंख्या भनेको ४ करोड १५ लाख भन्दा बढी रहेको छ ।

त्यस्तै ६१.१ प्रतिशतले जर्मन नागरिकले कम्तीमा एक डोज खोप प्राप्त गरेको पनि उनले बताएका छन् । प्रायः सबै नागरिकले शरद र जाडो मौसमसम्म खोप लिने पनि स्पानले ट्विटरमा लेखेका छन् ।

जर्मनीमा कोरोना भाइरस शुरुभएदेखि हालसम्म ३७ लाख ६६ हजार ५०१ व्यक्ति सङ्क्रमित भएका छन् । कोरोना सङ्क्रमणको कारणको ९१ हजार ५९२ व्यक्तिको मृत्यु भएको पनि सरकारी अधिकारीहरुले जानकारी दिएका छ ।